مهارات التفكير\ الدرس الخامس

تنمو القدرات العقلية بالتدريب وتضمر بالإهمال . مثلا عند وضع أحد أطراف الإنسان في وضعية التثبيت لفترة طويلة لعلاجها من كسرنمو التفكيرر مثلا، يلاحظ بعدها أن عضلاته صغر حجمها وتحتاج للعلاج الطبيعي حتي تعود. كل من توقف عن الدراسة لفترة مثلا ثم عاد ، يجد صعوبة شديدة في البداية ولكنه مع الإصرار والتكرار ينجح. كل من حفظ القرآن كاملا، لاحظ أن قدرته علي الحفظ وهو أحد الوظائف العقلية تزيد مع الوقت. لهذا فنصيحتنا لا تتوقف عن تدريب مهاراتك العقلية أبدا  وإن القراءة لتعد من أهم وسائل تنمية التفكير.

نحن معكم نستكمل أدوات مهارة التفكير الأولي وهي مهارة توسعة التفكير لتشمل بالأمر من كل جوانبه تمهيدا لاتخاذ قرار سليم وستجدون علي ذلك الرابط روابط الدروس الأربع السابقة والتي أري أنه من الضروري دراستها بالترتيب

https://wp.me/p9ho0b-dX

مراجعة سريعة علي ما مضي ثم الانتقال للسؤال الرابع( رجاءا راجع الدروس الأربع السابقة لتتمكن من المتابعة)

نحن نعمل علي تدريب العقل علي ألا يتخذ قرارا في الأمور الهامة قبل أن يوسع رؤيته حول هذا الأمر . وذلك من خلال مجموعة من الأسئلة والتي باستمرار استعمالها يتدرب العقل علي رؤية الأمور من جميع الجوانب وأن تكون معلوماته من مصادر موثوقة وسليمة.

سؤال 4:    ما هي النتائج و العواقب لهذا الشيء المعروض علي؟

النتائج يمكنها أن تكون :       قصيرة المدى-    متوسطة المدى  – طويلة المدى

نقوم بعرض الصورتين التاليتين علي الطلاب ونطلب منهم الشرح لما يرونه في الصورة كنموذج للنتائج المختلفة من حيث كونها جيدة أو غير جيدة . ومن حيث أنها جيدة في المراحل الثلاث أو أنها جيدة فقط في إحدى المراحل

مهارات التفكير 1 

                                 مهارات التفكير 2

هل من الممكن عكس العواقب؟

مثال :

– أنا أحب أكل الحلويات كثيرا

– أنا أدمن العاب الفيديو جيم و السوشيال ميديا

كثيرا ما تكون العواقب القريبة المدي جيدة  وممتعة ولكن العواقب بعيدة المدي سيئة، فما الحل؟

عند دراسة العواقب يجب دراستها بالنسبة للجميع  مثلا عائلتي أو زملائي. وليس فقط بالنسبة لي وحدي.

هل حدث لك أن مررت بتجربة ولم تري عواقبها ولكن كان الآخرون مدركين لها وقاموا بتحذيرك ولكن دون جدوي؟

ختام الدرس:

تطبع المشكلة التالية وتقدم للبنات للتطبيق عليها لكل الأدوات التي درسوها في الدروس الأربع السابقة

القصة

اسمي ايمان… وانا في الصف السادس الإبتدائي. بأكره الدنيا كلها….

نشأت وانا طفلة مع ام طيبة متفرغة لتربيتي انا واخواتي كمال الاكبر مني ونيرة الاصغر مني….ماما كانت طيبة بس انا كنت شقية وبأتحرك كتير. ..ماما كانت بتقول لي كده غلط كده عيب….اكتر ما بأسمع منها اي كلام تاني….حقيقي مكنتش فاهمة ليه لما اطنطط غلط ليه لما اجري غلط ؟؟؟ كمال ونيرة مش حركيين مش اشقيا كانت ماما بترتاح لهم ….اما انا كانت دايما متضايقة وبتعيط مني….وانا سني 5 و6 مكنتش بافهم ليه ..وكنت ساعات باحاول اقعد ساكتة…بس بتضايق اوي فلما اقوم اطنطط ماما تنهار….بابا اقترح اني اروح رياضة….رحت جمباز وانا سني 6 بس للاسف الكابتن كان بيشتم كتير وبيزعق مكنتش بأحب اروح…..

في المدرسة كمان كل شوية استدعاء لماما ايمان شقية….

وماما تقعد تقولي كلام صعب مش فاكرة منه غير”انت دايما عاملالي مشاكل ..ليه كده…انت مش زيينا”

كلامها كان بيغيظني اوي.بدأت تضربني وانا عندي 7 سنوات ،انا من وسط اخواتي كانت بتضربني وتعيط.ضربها مكانش جامد بس كان بيغيظني اكتر.كنت باتظاهر انه مش هاممني ضربها..وانا باتقطع من جوايا..بطلت اذاكر مش انا كده كده وحشة درجاتي سيئة…

بابا كمان بيضربني محدش بيحبني…في سنة خامسة ..اتعرفت علي وسام ،وسام مش شاطرة وجريئة اوي…صاحبتها جدا…وسام شجعتني ان احنا ناخد حجات من كانتين المدرسة والراجل مشغول في الزحمة….اترددت شوية…وبعدين افتكرت ان وسام هي الوحيدة اللي بتحبني ….سمعت كلامها اخدنا كيسين شيبسي…بعد كده..بقينا بناخد اللي احنا عاوزينه وقت الزحمة…بعدها…مرة الراجل شافنا

استدعاء اولياء امورنا…

وسام ابوها مجاش….فصلوها يومين  محدش سأل من عيلتها ،لكن انا.بابا كان وشه احمر جدا وهو بيسمع..وماما كانت محرجة جدا. مش قادرة اوصف اللي حصل…بابا كسر جسمي مضربنيش. كمال اترجاه يسيبني ونيرة بكت

لكن بابا نزل ضرب بالخرطوم لحد ما جسمي اتورم…وماما منهارة .كنت بالنسبة لهم عار ع الاسرة

ماما بتقول (ده احنا عمرنا ما دخلنا المدرسة غير عشان يكرموا اخوكي دلوقتي بسببك كله بهدلة)

بأكرهكم…..صرخت….بابا زود الضرب. يومان غايبة ف البيت….ولما روحت، محدش من البنات عاوز يكلمني…

خلاص احسن، اكلم الولاد. بدأت اصاحب وانا في ستة …صاحبت ولد في اولي اعدادي….كان عبيط فعلا…بس اهوه…اللي راضي يكلمني….ماما عرفت من الاخصائية…كالعادة صراخ..وضرب…

منها ومن بابا…ماما تقول (انت بلاء) وبابا يقول (اقتلك وارتاح منك )

وانا باقول اكرهكم

في المرحلة دي بدأت اخد…كل اللي بأحتاجه من شنط البنات …مشط..توكة….فلوس….😑مش بأطلب حاجة من ماماوبابا. شكاوي البنات ،جعلت الادارة تفتشنا..اتعرف انه انا…استدعاء جديد، بابا كان ساكت وشكله هيموت…

وماما دموعها مش واقفة…بعد شوية دخلت لي الاوضة مضربونيش المرة دي قالت لي (يا ايمان انا ماما ليه يا بنتي بعملي كده؟؟ لو محتاجة حاجة قولي لي ….) قلت في نفسي انت لو قلت لك هتقولي لي اني وحشة ومستاهلش حاجة لا طبعا مش هاقولك….قالت لي (انا هساعدك بس حرام اللي بتعمليه….)

حرام..وهو ضربي اللي بتضربوه مش حرام…كنت ساكتة يظهر انها افتكرتني مقتنعة…سمعتها بتقول لبابا انا كلمتها وربنا يسهل….لا جديد، سوي اليوتيوب…

مرة كده شفت مشهد امممم وبعدين بقيت بأشوف…بابا ضربني تاني وتالت …ماما منهارة…ودايما تعيط….انا مش بأحبهم خالص…طول عمري بيعاملوني وحش جدا….انا بالذات…

بابا اخدني لدكتور نفساني، قال اني مضطربة واداني دوا وبابا خاف من الدوا….في كل المناسبات بأحس انهم كانوا بيتمنوا موتي….كمال بيصليونيرة لكن انا ﻷ. من باب العند معاهم مش بأصلي…

مستر الدين اسمه مستر عماد…كان بيسألنا مين بيصلي؟؟وبيكلمنا عن الصلاة….انا قلت مش بأصلي…

سألني ليه؟

قلت له عشان بأكره بابا وماما….اجابتي كانت غريبة وسط اجابات تانية كسل او …بيقطع في الصلاة .قال لي تعالي لي في الفسحة….مرحتش…الحصة اللي بعدها سألني ليه مجيتيش؟؟ مردتش….ابتسم…مش بتريقة…

وسام قالت لي انه سأل عني البنات وانا غايبة وقالوا اني اسوأ بنت في الفصل….ناداني وانا في حصة الالعاب…

تعالي واستئذن مدرسة الالعاب…قلت له ايوة يا مستر؟ قال لي (ليه قلتي لي انك بتكرهي بابا وماما؟) قلت بلا مبالاة (عشان مش فاهمني ….ينفع امشي بقه؟) ابتسم….قلت له (ايه اللي بيضحك ؟) قال (شايفك زعلانة اوي) قلت له (اللي بيتعامل زيي لازم يزعل /قال لي(قصدك ايه؟) قلت له 😈 (ضرب وزعيق ) ينفع امشي بقه؟

ابتسم…قال لي اتفضلي….

مش عارفة ايه اللي حصل بس مستر عماد…بدأ في حصته..يكلمني يطلب مني مسح السبورة..او توزيع شئ كمان لاحظت ان مراته ميس فاطمة مدرسة العربي بتعمل كده…ساعات …كمان تجيب لي توك او وردة….كنت باستغرب وبعدين شكرت ميس فاطمة…وشكرته…حصة الدين والعربيمعدتش باتضايق….باحاول اركز….بجاوب ،بيفرحوا بيا اوي….انا حد بيفرح بيا ؟

#مستر عماد اصر اني اقرأ القرآن في اذاعته….انا ؟؟؟؟لا مرضيتش..بس هو اصرالفصل اتريق…مستر عماد سكتهم بحزم…فعلا قرأت…سورة الفجر بصوت مرتبك….ميس فاطمة ومستر عماد شجعوني…مستر عماد قال لي (عاوزين نبقي النفس المطمئنة )

اندهشت…يعني ايه؟؟ قال لي (نقرب من ربنا؟؟)

عمري ما فكرت في ربنا…الا من باب اغاظة بابا وماما….بعدم الصلاة….ماما بتبكي دايما وبتاخد مهدئات بسببي

وبابا متعصب….مستر عماد قال لي ان ربنا رحمته كبيرة اوي …..هو بيصلي وميس فاطمة بتصلي…بس متجوزين من 10 سنوات ومعندهمش أولاد. ..ميس فاطمة قالت لي انتي بنتي 😊فرحت شوية….معرفش ايه اللي حصل

المدرسين بدأوا يتحسنوا معايا….مستر عماد كلمهم مثلا؟؟؟ سألته  قال لي بصراحة (ايوة انا شايف فيكي خير ومش عاوز حد يهينك )

انا….خير……؟

قلت له (يا مستر انا بأسرق….وكمان بأغش في الامتحانات….وماما وبابا بيكرهوني 😔) مكنتش باعيط…بس كنت نفسي اعيط….فاجأني رده….حضرتك مش ممكن ؟؟؟؟؟؟)قلت له كده…قال لي بصدق (والله كنت كده……بس فيه حاجة غيرتني…..)

كان نفسي اعرفها بس جرس البريك رن…ولازم نطلع الفصل….في اليوم التالي دورت ع المستر…كان واقف مع تانية تالت في الملعب بيكلمهم  ….ابتسم 😊قال لي (تعالي يا ايمان )

حكي لي (انا كنت زيك بالضبط وليا كمان واحد صاحبي اسمه معتز …كان صديقي اوي نغش سوا وكل شئ سوا…..لحد…ما….انا ومعتز عملنا حادثة كانت عربية مامته….وكنا في ثانوية عامة….) قلت له (وبعدين ؟)

قال لي (معتز مات …وانا ﻷ)

ساعتها فكرت كتير في ربنا…..كلامه هزني….دمعت عيوني..وهو بيوريني صورة معتز…في محفظته…لكن اكتر شئ فرحني لما مستر عماد عمل استدعاء لبابا وماما. ..جم خايفين وشكر فيا امامهم….هو وميس فاطمة….

بابا سكت مذهول…ماما …سكتت…بعدها مستر عماد قالي روحي فصلك….وكمل هو قعدته معاهم….شفته من زجاج….الشباك…..كان بيتكلم باخلاص…اوي….ماما وبابا ساكتين….كنت عاوزة ادعي ربنا يدخل مستر عماد الجنة عشان هو اول حد طيب اقابله في حياتي…..بس انا مش بأصلي….اتوضيت في الفسحة وصليت عشان ادعي له وسام مندهشة….لما روحت بابا وماما كانوا ساكتين….فوجئت بماما تحضني في اليوم التالي !!!!!!

وبابا عزمني ع الغدا…..

قال لي في تأثر (مستر عماد دارس وفهمني نمط شخصيتك  يا ايمان وانك حركية ومكنش يجب اضربك خالص….انا اسف…)

دموعي سالت امام بابا لاول مرة…….

يعني ايه انا مطلعتش وحشة ؟)بابا طبطب علي….قال لي (مستر عماد قال لي ان الحركي بيتنطط وبيتحرك ومش هادي…وان ضربه اساءة ليه ) رددت (يعني انا مش وحشة ؟)

بابا بكي…كان شكلنا غريب…شكرا يا مستر عماد..انك قلت لهم اني مش وحشة….رحت له…..ابتسم 😊عيطت

قلت له (انت الوحيد اللي افتكرني مش وحشة ) تغيير في المعاملة..ماما بتحضني وبابا كمان..وساعات نيرةالحضن بيحسسني بحبهم….بأصلي والله عشان ادعي لمستر عماد .بس فجأة فكرت ان ربنا اللي ارسله ليا…هأصلي عشان ربنا يرضي عني….يااااااه…علاقتنا اتغيرت انا وبابا وماما رجعت لهم ..بقلبي بدأت اسمعهم واستجيب لهم..القرب من ربنا غير كتير في اخطائي….حاولت  مع وسام ..بقينا بنصلي ….ماما بتحترمني وتاخد رأيي…اتغيرت الامور كتير

انا الان عمري 25….مدرسة انجلش..مستر عماد كبر …وميس فاطمة….كمان …مخلفوش…..غيري انا…… البنت الفاشلة اللي وقفوا جنبها وهي بتسأل عليهم بعد ما كبروا وكبرت و حافظة جميلهم….الحركي بيتحرك يقفز.

الأسئلة: – من وجهة نظر الأب والأم ..ما الخطأ الذي قاموا به

الإبنة المختلفة ونمط شخصيتها الخاص لو جمعوا عنه معلومات صحيحة الايجابي والسلبي والغامض

لكان أمامهم بدائل واكثر من طريقة للتعامل: لو درسوا عواقب كل طريقة ، بالتأكيد كانوا سيختارون طريقة اخري غير الضرب.

–       من وجهة نظر البنت:

عرضت علي الفتاة في قصتنا أن تقوم بعملية السرقة.

أن تشاهد  الأفلام الإباحية

أن تصاحب الأولاد

نفذي أدوات التفكير السابقة لتساعديها في تصحيح القرار الذي اتخذته وعلي المعلم أن يقسم الطلاب إلي مجموعات ويفكرون سويا ثم يعرضون منتج الورشة علي الجميع للنقاش.

 

شكر واجب:

للدكتور علاء حسين إستشاري التقويم والمتابعة والذي إستفدنا بالصور التي أعدها